Американскиот претседател Доналд Трамп јавно го предупреди Иран да не презема одмазднички напади по најновата ескалација, откако на својот профил на Truth Social објави дека Техеран наводно најавил оти „денеска ќе удри многу силно, посилно отколку што некогаш удриле претходно“. „Подобро да не го прават тоа“, порача Трамп, додавајќи дека доколку Иран сепак нападне, САД ќе возвратат „со сила што никогаш претходно не е видена“.
Предупредувањето доаѓа по серија воздушни удари врз Иран, за кои повеќе медиуми јавуваат дека биле насочени кон воени и државни локации и структури поврзани со раководството. Во меѓувреме, се појавија и контрадикторни информации за судбината на врховниот лидер ајатолахот Али Хамнеи: Ројтерс, повикувајќи се на висок израелски функционер, објави дека Хамнеи бил убиен, додека официјална потврда од Техеран во моментот на објавата не беше наведена.
Иранската Црвена полумесечина соопшти дека во нападите загинале најмалку 201 лице, а 747 се повредени, наведувајќи дека погодени биле 24 од 31 провинции и дека службите се во состојба на готовност. Паралелно, дел од извештаите говорат дека Иран започнал одмазднички ракетни напади кон цели во Израел и кон американски бази во регионот, што дополнително ги подигна тензиите и ги засили стравувањата од поширок регионален конфликт.
