ВЛЕН повторно го отвори прашањето за постапката поврзана со поранешниот прв вицепремиер Артан Груби, обвинувајќи ја ДУИ дека со отворање други политички теми се обидува да го тргне вниманието на јавноста од својот поранешен висок функционер.
Од партијата сметаат дека јавноста, наместо нови меѓупартиски препукувања, заслужува конкретни информации за тоа до каде е предметот за Груби и дали има напредок во постапувањето на надлежните институции.
ВЛЕН ја поврзува оваа тема и со ставањето на Груби на американската „црна листа“, прашувајќи дали поранешниот функционер располага со информации што би можеле да отворат дополнителни прашања за работењето на ДУИ.
Истовремено, од партијата посочуваат дека во периодот додека ја извршувал функцијата прв вицепремиер, Груби потпишувал одредени официјални документи исклучиво на македонски јазик. Со ова, според ВЛЕН, се доведува во прашање искреноста на актуелните критики на ДУИ поврзани со јазичната примена во институциите.
ВЛЕН ја повика ДУИ да се приклучи на барањето до Обвинителството и да побара јавно соопштување на информациите за текот на предметот.
Од партијата оценуваат дека фокусот не треба да се префрла врз административни и процедурални прашања, туку врз можната одговорност на поранешниот прв вицепремиер и причините поради кои јавноста сè уште нема прецизни информации за случајот.
ВЛЕН бара надлежните институции да соопштат дали постапката е активна, во која фаза се наоѓа и дали нејзиното натамошно отворање може да доведе до испитување на работата и на други поранешни функционери на ДУИ.
