Ратко Младиќ почина во болница во Хаг, а пред да бидат објавени резултатите од истрагата, Милорад Додик веќе ја соопшти својата верзија: станувало збор за „убиство“!
Лидерот на СНСД директно го обвини Хашкиот механизам за нехуман однос кон поранешниот командант на Војската на Република Српска. Според Додик, Младиќ можел да живее подолго доколку добивал подобра медицинска помош. За овие сериозни тврдења, сепак, не беа приложени медицински докази.
Холандските власти веднаш започнаа постапка за утврдување на околностите под кои почина Младиќ. Станува збор за стандардна законска процедура што се спроведува кога притворено лице ќе почине во болница.
Паралелно со тоа, претседателката на Хашкиот механизам, Грасиела Гати Сантана, нареди посебна и целосна истрага. Случајот му е доверен на судијата Ијан Бономи, кој треба да испита што точно се случувало во деновите пред смртта на Младиќ.
Отворањето на истрагите само по себе не значи дека постои доказ за пропуст или за намерно загрозување на неговиот живот. Додека Додик зборува за „убиство“, официјалната медицинска документација покажува дека здравствената состојба на Младиќ нагло и неповратно се влошувала.
Во извештајот од 13 август било наведено дека тој влегол во последната фаза од животот и дека смртта може да настапи во секој момент. Лекарите процениле дека натамошните медицински интервенции не би донеле значително подобрување, поради што третманот бил насочен кон намалување на болката, ублажување на страдањето и обезбедување што е можно поголема удобност.
Само една недела пред смртта, на 20 август, Хашкиот механизам го одбил последното барање Младиќ да биде предвреме ослободен и префрлен во Србија.
Клучен детал во судската одлука е тоа што ниту одбраната не тврдела дека медицинскиот персонал во Хаг постапувал несовесно. Не било наведено ниту дека Младиќ во Србија би добил подобра грижа во последната фаза од животот.
Напротив, во независен медицински извештај било забележано дека самиот Младиќ изјавил оти е „многу задоволен“ од односот на лекарите и медицинските сестри.
Тој бил под постојан медицински надзор, со обезбедена палијативна грижа и целосна помош за секојдневните потреби. Поради неговата тешка состојба бил проширен и режимот за посети од семејството.
Од петтемина судии консултирани за последното барање, двајца сметале дека Младиќ треба да биде ослободен за последните денови да ги помине со семејството, додека тројца биле против.
Нивниот став бил дека во затворската болница му се обезбедени соодветна медицинска грижа и човечки услови, како и дека блиската смрт не создава автоматско право на предвремено ослободување.
Ратко Младиќ издржуваше доживотна казна за геноцидот во Сребреница, злосторства против човештвото и воени злосторства за време на војната во Босна и Херцеговина. Пресудата против него стана правосилна во 2021 година.
Сега двете истраги треба да го дадат конечниот одговор за околностите на неговата смрт. До тогаш, обвинувањето на Додик останува тешко политичко тврдење без јавно објавени медицински докази.
