Поранешниот хрватски премиер Иво Санадер (72) денеска е пуштен на условна слобода, откако одлежал две третини од затворската казна. Одлуката ја донесе Жупанискиот суд во Сисак.
Санадер беше осуден на вкупно 18 години затвор за низа корупциски афери, а за време на издржувањето на казната имаше право на одредени бенефиции согласно Законот за извршување на казната затвор.
На последното рочиште одржано на 31 јули, судот оцени дека Санадер ги исполнува законските услови за предвремено ослободување.
Казните му беа изречени поради неколку сериозни корупциски случаи:
За извлекување пари од државни компании и нивно пренасочување во таен фонд на ХДЗ, како и за недокументирани донации – 7 години затвор;
За примање поткуп од 17,5 милиони куни од бизнисменот Стипе Фиолиќ – 6 години затвор;
За примање мито од 10 милиони евра во замена за управувачки права во ИНА, кои ги препуштил на унгарската компанија MOL – 6 години затвор.
Вкупно, Санадер поминал околу седум и пол години зад решетки, како во притвор, така и по правосилни пресуди.
![]()

