(ФОТО+ВИДЕО) Мицкоски и Ѓорѓиевски во вечерна обиколка: Скопје конечно личи на метропола, ќе се осветли Камениот мост

Премиерот Христијан Мицкоски и градоначалникот на Скопје, Орце Ѓорѓиевски, синоќа извршија обиколка на главниот град. Обиколката следи откако Центарот на Скопје и кејот на Вардар викендов повторно беа чистени со вода.

Градоначалникот Ѓорѓиевски, преку социјалните мрежи, ја истакна состојбата во градот:

„Вечерна обиколка на Скопје со премиерот Христијан Мицкоски. Сега конечно личи на метропола, како што доликува. Улиците и плоштадите чисти, полни со посетители – ја нема онаа лоша слика на која навикнавме. И никогаш повеќе нема да се повтори!“

Тој додаде дека е посетен и просторот на Луна Паркот, за чија реализација наскоро ќе започне постапка.

„Го посетивме и она што долги години му треба не само на Скопје, туку и на Македонија – Луна Паркот за кој наскоро започнуваме постапка за негова реализација“, соопшти Ѓорѓиевски.

Премиерот Мицкоски, исто така, даде свој коментар за посетата:

„Вечерна обиколка на плоштадот и дел од Градскиот парк. Се беше чисто и средено како што доликува за нашето Скопје! Го посетивме и Луна Паркот за кој наскоро се започнува постапка за негова реализација.“

Градоначалникот Ѓорѓиевски информираше и за добиена донација за осветлување на Камениот мост. Донацијата од турска општина изнесува 9 милиони денари. За реализација на проектот се чека одобрение од министерот за култура и туризам, Зоран Љутков.

Ѓорѓиевски, исто така, посочи на проблемот со одржувањето на јавната хигиена, конкретно жалејќи се дека контејнерите често се расипуваат, што генерира високи трошоци за нивна поправка.

Loading