Американските берзи ја започнаа новата трговска недела со умерен оптимизам, откако индексите S&P 500 и Nasdaq ја заокружија третата последователна недела со добивка. Поддршка за акциите донесоа охрабрувачките податоци за инфлацијата и подобрите деловни резултати на американските компании.
Во азиското тргување во понеделникот, фјучерсите на S&P 500 напредуваа за 0,2 проценти, достигнувајќи 7.816,75 поени. Фјучерсите поврзани со Nasdaq 100 пораснаа за 0,5 проценти, на 30.276,50 поени, додека оние на Dow Jones забележаа пад од 0,1 проценти, на 53.774 поени.
Позитивните движења следуваат по нерамномерното тргување во петокот. S&P 500 тогаш загуби 0,2 проценти, а Nasdaq се намали за 0,1 проценти, под влијание на послабите податоци за малопродажбата и наглото поскапување на нафтата.
И покрај падот на крајот од седмицата, S&P 500 на неделно ниво оствари раст од 0,4 проценти, додека Nasdaq доби 0,1 проценти. Со тоа двата индекса ја продолжија позитивната серија трета недела по ред. Dow Jones, пак, ја заврши неделата со загуба од 0,6 проценти.
Во текот на неделата S&P 500 достигна и ново рекордно ниво на затворање од 7.816,70 поени.
Главниот поттик за инвеститорите пристигна од податоците за ценовните движења во САД. Потрошувачките цени во јули се зголемиле за само 0,1 проценти во однос на претходниот месец, додека производствените цени останале непроменети.
Ваквите показатели ги зајакнаа очекувањата дека инфлациските притисоци постепено попуштаат. Истовремено, се намалија стравувањата дека Федералните резерви во блиска иднина би можеле повторно да ги зголемат каматните стапки.
Претпазливоста, сепак, останува присутна бидејќи инфлацијата сè уште се задржува над целта на американската централна банка од два проценти.
Дополнителна поддршка за берзите обезбедија финансиските извештаи на компаниите. Околу 85 проценти од компаниите што ги објавиле резултатите до средината на неделата ги надминале очекувањата на аналитичарите за остварениот профит, покажуваат податоците на LSEG, пренесени од Ројтерс.
И покрај позитивните сигнали, инвеститорите внимателно ги следат податоците за американската потрошувачка. Падот на малопродажбата во јули отвори прашања за силата на побарувачката и за можноста домаќинствата да го задржат досегашното темпо на трошење.
Дополнителен притисок претставува поскапувањето на нафтата за речиси шест проценти во текот на минатата недела, предизвикано од зголемените тензии околу Ормутскиот Теснец.
Доколку енергенсите продолжат да поскапуваат, тоа би можело повторно да ја поттикне инфлацијата и да го стесни просторот на Федералните резерви за евентуално намалување на каматните стапки.
Во фокусот на пазарите оваа недела ќе бидат финансиските резултати на големите трговски синџири Home Depot, Target, TJX Companies и Walmart. Нивните извештаи треба да понудат појасна слика за состојбата на американскиот потрошувач.
Инвеститорите во среда ќе ги анализираат и записниците од јулскиот состанок на Федералните резерви, барајќи сигнали за проценките на централната банка за инфлацијата и за идното движење на каматните стапки.
