Класичната музика не треба да се доживува како привилегија за мал круг луѓе. Таа може да допре до секого, но за тоа се потребни отворени културни институции, посветени наставници и можности децата од најрана возраст да се сретнат со музиката. Ова беше една од главните пораки на професионалниот тромбонист Виктор Илиески во интервју за „Студио 10“ на Телевизија 24
Илиески посочи дека човек не мора стручно да ја разбира класичната музика за да ја доживее. Според него, институциите имаат задача да излезат и надвор од концертните сали, да се доближат до училиштата и семејствата и истовремено да ја едуцираат публиката.
Во разговорот се осврна и на почитта кон уметничката професија. Публиката го гледа готовиот концерт, но зад него стојат години учење, илјадници часови вежбање и заедничка работа на оркестарот. Илиески потсети дека и самиот поминал низ повеќе аудиции пред да стане дел од Филхармонијата. Затоа, смета тој, вреднувањето на музичарите не може да се сведе само на пресметка на плати и коефициенти.
Како поранешен раководител на Филхармонијата, тој зборуваше и за значењето на програмата, обновувањето на кадарот и одржувањето на концертните објекти. Укажа дека трошоците за организирање концерти растат и дека е потребна поголема поддршка за програмските активности, за институциите да можат да понудат квалитетна и разновидна содржина.
Посебен дел од интервјуто беше посветен на музичкото образование. Илиески раскажа дека во своето училиште „Музичка нота“ https://www.facebook.com/profile.php?id=61582754716342 работи со деца од најрана возраст, но и со возрасни кои сакаат да научат инструмент. Според него, талентот треба навреме да се препознае и искрено да се разговара со родителите за напредокот на детето. Музиката, додаде, не се учи само од книга: посетите на проби и концерти и практичното свирење можат да ја разбудат љубовта кон неа.
Неговата завршна порака беше упатена до родителите и до општеството: да им се даде простор на децата да ги откријат своите способности во музиката, културата и спортот, наместо нивното внимание да остане врзано само за екраните.
