Полициска акција во Судски совет, се бараат записниците на Дамева

Полицијата попладнево влезе во Судскиот совет, каде што врши претрес. Полицијата бара записници од седница на Судски совет во врска со мандатот на поранешната претседателка Весна Дамева, која минатата недела, на 2 декември, два дена пред истекот на мандатот, поднесе оставка од функцијата претседател на Судскиот совет.

„Полициски службеници по Наредба на ОЈО Скопје постапуваат во Судски совет, односно се обезбедуваат два записници, за да се проверат евентуални елементи на кривично дело“, информира Основното јавно обвинителство Скопје.

Премиерот Христијан Мицкоски на 28 ноември од собраниската говорница, одговарајќи на пратенички прашања, рече дека континуирано добива информации за тоа што се случува во Судскиот совет.

– Таму има еден клан од двајца, еден од тројца, една е сама, добивам документи од свиркачи за фалсификувани записници со различни дати, различни печати, без потписи. И ако тоа не е основа за јавниот обвинител да влезе и да провери, не знам кој глас треба да допре до Обвинителството, за да постапи – рече тогаш премиерот Мицкоски.

Loading