Денес масовен студентски протест во Белград: Ултиматум до Владата и предупредувања за „граѓанска непослушност“

Студентите во Србија денеска организираат голем протест на Славија, барајќи итна реакција од Владата. Тие поставија два јасни барања: распуштање на парламентот и распишување вонредни избори, како и прекин на долгогодишниот протестен камп на студентите во Пионирски парк. Доколку барањата не се исполнат до 21 часот, најавија дека „не можат да ја предвидат реакцијата на граѓаните“ и повикаа на можни акции на граѓанска непослушност.

Протестот започнува во 18 часот, со собири на неколку локации низ градот, од каде студентите и поддржувачите ќе маршираат кон Славија. Во најавата е вклучен и културно-уметнички дел со говори, музика и поезија, кој ќе трае до 21.20 часот.

Белград моментално функционира без прекини во сообраќајот, но безбедносните мерки се засилени. Околу Собранието и Пионирски парк поставени се метални огради и е распоредена полиција. Министерот за внатрешни работи, Ивица Дачиќ, изјави дека ќе бидат преземени мерки во случај на каква било провокација или насилство.

Претседателот Александар Вучиќ порача дека Србија нема да прифати ултиматуми и ги повика организаторите да не предизвикуваат немири:
„Ги молам сите што сакаат да ја уриваат српската држава, не правете го тоа. Не само што нема да успеете, туку ќе сносите последици,“ рече Вучиќ, најавувајќи дека институциите ќе реагираат само доколку е неопходно.

Обвинителството, исто така, испрати апел за воздржаност и почитување на јавниот ред.

Настанот, закажан токму на Видовден, симболично подгреа тензии и шпекулации, откако дел од студентските претставници најавија дека „ќе се случат нешта кои никој не ги очекува“.

Додека јавноста внимателно го следи развојот, останува неизвесно дали ова ќе биде мирен граѓански протест  или почеток на нов бран политички притисоци во Србија.

Loading