Газдата на импровизираната дискотека „Пулс“ во Кочани, Дејан Јованов-Деко – главниот обвинет за катастрофалниот пожар во кој загинаа 63, а над 200 лица беа повредени – не се чувствува виновен за несреќата. На денешното судско рочиште, неговата адвокатка истакна дека тој бил ставен во заблуда од надлежните институции и дека може да одговара само за небрежност, но не и за умисла.
Адвокатката тврдеше дека Јованов бил уверуван од сопственикот на објектот дека просторот е безбедно изграден, а надлежните инспекции и служби, кои издавале лиценци, не ја завршиле работата како што треба. Според неа, токму институциите и останатите лица кои имале обврска да проверат дали објектот ги исполнува условите, ја носат реалната одговорност за трагедијата.
Обвинувања кон останатите 34 обвинети
Во својот воведен говор таа ги посочи речиси сите други обвинети – од членовите на групата „ДНК“ кои, како што тврди, сами внесле пиротехника без дозвола, до лицата од обезбедувањето, вистинскиот сопственик на објектот и службениците што издавале одобренија и лиценци.
Со ова, адвокатката индиректно му оддаде признание на Обвинителството за тоа што во едно обвинение ги обедини сите 35 лица за случувањата поврзани со „Пулс“.
Сите обвинети се изјаснија како невини
Сите 35 обвинети, меѓу кои и Јованов-Деко, денес се изјаснија како невини.
Јованов е сопственик и основач на фирмата „Класик ДМ кафе“, преку која биле издавани дел од лиценците за функционирањето на дискотеката.
Одбраната и на другите обвинети префрла вина кон институциите
Адвокатот на второобвинетиот Митко Стојанов изјави дека неговиот клиент сторил сè што можел за да помогне во трагичната вечер, посочувајќи дека системските пропусти и „работењето отприлика“ се причината што во земјава постојано се случуваат вакви несреќи.
И за синoт на Деко – Михаил Јованов – одбраната рече дека обвинението е нелогично и дека обвинителството нема докази против него, освен фактот што е син на газдата.
Контекст: Случајот „Пулс“ – една од најголемите трагедии во Македонија
Трагичниот пожар што ја зафати импровизираната дискотека „Пулс“ на 16 март ја потресе целата земја. Истражните материјали веќе открија низа неправилности, а меѓу нив и случајот со поранешниот советник во Министерството за економија Џеваир Камбери, кој беше обвинет за мито поврзано со дозволите за „Пулс“ и во чија ќелија беа најдени 13 мобилни телефони и лаптоп.
![]()

