Новите измени во законската регулатива за пушење наскоро ќе се најдат пред Владата, а угостителскиот сектор ќе се соочи со значајни промени во работењето. Предлог-законот, кој треба да биде разгледан на владина седница на 24 март, предвидува построги правила со цел подобра заштита на непушачите.
Според најавите од Министерството за здравство, новите решенија се резултат на консултации со засегнатите страни, вклучително и угостителите и претставници од индустријата. По направените анализи, дел од првичните предлози се коригирани за да бидат попрактични за примена.
Една од главните новини е задолжителната физичка поделба на просторот во локалите – јасно одвоени зони за пушачи и непушачи. Во одредени случаи, објектите ќе мора да обезбедат и посебен влез за делот каде што не се пуши, со цел граѓаните да не бидат изложени на чад уште при влез.
Промени има и кај користењето на терасите. Наместо досегашниот услов за три отворени страни, новиот предлог дозволува тие да функционираат како зона за пушење и со две отворени страни. Ова решение, како што посочуваат надлежните, се базира на анализи кои покажуваат дека во такви услови се овозможува доволна циркулација на воздухот.
Од Министерството потенцираат дека целта на законот не е рестрикција, туку балансирање на правата – заштита на непушачите, но и обезбедување јасно дефиниран простор за пушачите.
Се очекува по владината процедура, законот да продолжи во Собранието, а надлежните изразуваат уверување дека ќе биде усвоен во разумен рок. Долгорочната цел е намалување на бројот на пушачи и подобрување на јавното здравје во земјата.
