ЕДНИ СÈ УШТЕ ЗАД РЕШЕТКИ, НЕКОИ ПОЧИНАА, ДРУГИ ПОБЕГНАА – СЕГА СЕ БАРА НОВО СУДЕЊЕ: КОЈ ИМА КОРИСТ?

Ако правдата се враќа, за кого точно се враќа  и дали доаѓа навреме за оние на кои им беше најпотребна?

Поранешниот министер за внатрешни работи Митко Чавков повторно бара отворање на постапката за случајот 27 април 2017, повикувајќи се на европските стандарди и правото на фер судење. Во своето обраќање, тој тврди дека не бара привилегија, туку правна можност за преиспитување на пресудата.

Пораката зад барањата за ново судење во случајот со 27 април 2017 доаѓа во момент кога раните од тие настани сè уште не се затворени. Дел од осудените и денес се зад решетки, други веќе го поминаа најголемиот дел од казната, а има и такви што не дочекаа слобода. Во таа реалност, прашањето „кој има корист?“ не е само реторика туку суштинска дилема што ја мачи јавноста.

Тешко е да се најде одговор што ќе ги вклучи оние кои ја платиле највисоката цена. За нив, секоја нова правна иницијатива доаѓа предоцна. Ниту пак користа е очигледна за оние што со години ја издржуваат казната  нивниот живот веќе е променет, времето не може да се врати назад. Затоа, дебатата сè повеќе се префрла од правото кон перцепцијата: дали повторното отворање на постапките служи за вистинска правда или за ново политичко и правно позиционирање?

Во услови кога паралелно се отвораат и теми за враќање на Никола Груевски, контрастот станува уште понагласен. Едни ја издржаа казната, други ја избегнаа, трети сега бараат нов почеток. Во таков амбиент, довербата во системот не се гради со декларации, туку со доследност, а токму таа доследност најмногу недостасува.

Затоа и дилемата останува отворена: ако правдата се враќа, за кого точно се враќа  и дали доаѓа навреме за оние на кои им беше најпотребна?

Loading