КОЈ БИЛ НАВИСТИНА БОЛЕН, А КОЈ САМО НА ХАРТИЈА?

Повеќе од 3.000 случаи на можно незаконско користење боледување во јавниот сектор биле детектирани во анализите на Фондот за здравствено осигурување на Македонија. Најголем број сомнителни отсуства се евидентирани во Министерството за внатрешни работи и во Армијата, а најавени се детални проверки и постапки за утврдување одговорност.

Особено загрижува податокот дека дел од вработените во униформираните служби останувале на непрекинато боледување подолго од пет години. Меѓу спорните случаи има и отсуства што траеле од една до три години, како и боледувања продолжувани во период од три до пет години.

Фондот ќе ги испитува околностите под кои биле одобрувани долготрајните отсуства и дали постоела медицинска основа за нивното продолжување. Случаите кај кои ќе бидат утврдени индиции за незаконско стекнување материјална корист или оштетување на буџетот ќе бидат доставени до надлежното обвинителство.

Проверките нема да бидат насочени само кон вработените што ги користеле боледувањата. Одговорност ќе се бара и кај медицинските лица и институционалните механизми што овозможиле отсуствата да траат со години.

Под лупа ќе се најдат матичните лекари и специјалистите што ги издавале наодите, дијагнозите и медицинските извештаи. Ќе се проверува и постапувањето на лекарските комисии во ФЗОМ, кои одлучувале за продолжување на боледувањата над законски утврдените рокови.

Надлежните треба да утврдат дали станува збор за поединечни пропусти или за пошироко воспоставена практика преку која одредени вработени со години ги избегнувале работните обврски, истовремено користејќи средства од јавните фондови.

ФЗОМ најавува систематска контрола на боледувањата подолги од 30 дена, но и построги процедури при одобрувањето лекување во странство. Барањата за упатување пациенти надвор од државата ќе поминуваат низ дополнителни проверки за да се спречи неоправдано трошење на средствата.

Целта, според најавите, е парите од Фондот да бидат насочени кон пациентите на кои навистина им е неопходен медицински третман што не може да им биде обезбеден во домашните здравствени установи.

Loading