Претседателот на Владата, Христијан Мицкоски, на собраниска седница за пратенички прашања изјави дека владата ќе стори сè за да ја внесе Македонија во ЕУ со македонски идентитет и јазик, а не како „модерни“ Македонци, бидејќи, како што рече, се покажа дека суштината на барањата на Бугарија не е само вклучување на Бугарите во Уставот, туку менување на идентитетот.
Одговарајќи на прашање од Венко Филипче, премиерот истакна дека ВМРО-ДПМНЕ не одбило учество во 2022 година, туку барало соработка околу Францускиот предлог.
– Немам проблем и 30 заедници да вметнеме во Уставот, но имам проблем да преговарам со некој што нè негира и нè спречува да бидеме тоа што сме. Се сомневам дека тоа не е последна отстапка – рече Мицкоски, и додаде дека Францускиот предлог е единствен во Европа каде што членството зависи од историска комисија.
Тој запраша зошто воопшто се преговарало за јазикот и идентитетот ако, како што вели СДСМ, никој немал право на тоа.
– Зошто сте преговарале ако не сте имале мандат? Тогаш ви реков дека нема да помине вака и предложив две измени – истакна Мицкоски.
Премиерот рече и дека е легитимно Македонците да бидат дел од Министерскиот совет што управува со Комитетот за етнички заедници, во кој ги има Ерменците, Ромите, Турците, Евреите и Власите, но не и Македонците.
Посочи дека во Европскиот парламент сега, за разлика од претходно, трипати се споменуваат македонскиот јазик и идентитет во извештајот на АФЕТ, додека претходно станувало збор за „северномакедонски“.
– Еден европратеник, во име на неколку групи, предложи модификација – да се додаде зборот „модерен“. Тоа е суштината на Францускиот предлог. Ќе направиме сè што е во наша моќ да почнеме преговори, но не како „модерни“ Македонци – заклучи Мицкоски.
![]()

