Ковачев за нападот на Арсовска: Уште еден напад на бугарски државјанин

Бугарскиот европратеник Андреј Ковачев, по нападот на градоначалничката Данела Арсовска, вели дека се случил уште еден напад на бугарски државјанин во Македонија. Тој во објава на социјалните мрежи изјави дека е сериозно загрижен за она што во текот на денот ѝ се случило на скопската градоначалничка, за која рече дека е бугарска државјанка. Ја повика амбасадата на Бугарија во Скопје да ѝ обезбеди правна, конзуларна и морална заштита.

„Уште еден вознемирувачки напад врз бугарски државјанин во Северна Македонија! Уште еден случај на насилство, малтретирање и јавно линчување врз бугарски граѓани кои држат високи јавни функции и стекнале бугарско државјанство врз основа на докажано бугарско потекло – само затоа што се осмелиле да се декларираат како Бугари“, напиша Ковачев во објава на Фејсбук.

Тој оцени дека притисокот во земјава врз граѓаните што се декларираат како Бугари е толку голем што, како што вели, тие се принудени да го кријат или негираат својот бугарски идентитет.

„Сличен случај се случи и со министерката за енергетика Сања Божиновска, неколку пратеници од владејачката ДПМНЕ, како и луѓе од најтесниот семеен круг на сегашниот, претходниот и претходните премиери на земјата“, додава европратеникот.

Loading