Во пресрет на најавениот протест за поддршка на поранешните водачи на Ослободителната војска на Косово (ОВК), кој треба да се одржи на 13 декември на плоштадот „Скендербег“ во Скопје, крилото на Алијансата за Албанците предводено од Арбен Таравари објави дека целосно стои зад оваа иницијатива. Според нив, протестот е организиран „во одбрана на вредностите на косовската ослободителна војна“ и во знак на несогласување со, како што велат, неправедното притворање на поранешните команданти во Хаг.
Организаторите објаснуваат дека ги исполниле сите законски обврски и дека од Град Скопје се чека само формалното одобрение за одржување на протестот. „Комуналната такса е платена и очекуваме дозволата да биде издадена без пречки, бидејќи станува збор за уставно загарантирано право“, истакна Бујар Дардишта од Организацискиот совет.
Градоначалникот на Чаир, Изет Меџити, исто така даде зелено светло за протестот, посочувајќи дека како прв човек на општината ќе обезбеди негово уредно одржување. Меџити кажа дека го поддржува протестот, но сè уште не откри дали лично ќе се појави на плоштадот.
Од друга страна, премиерот Христијан Мицкоски изјави дека иницијативата на лидерот на ДУИ, Али Ахмети, да се протестира за ОВК е „погрешен потег“, и повика одлуката да се преиспита. Политичките реакции, поддршката од повеќе албански политички субјекти и очекувањата за масовност го прават овој настан еден од најкоментираните во јавноста.
Дали протестот ќе помине мирно и колку учесници ќе собере – останува да се види на 13 декември.
![]()

