СРБИЈА ПОД МЕТЕО УДАР: СНЕГ ДО 30 СМ И СМРЗНАТ ДОЖД – КОГА СЛИЧНО ВРЕМЕ ДОАЃА ВО МАКЕДОНИЈА?

Според метеоролозите, слично време не се очекува веднаш во Македонија, но студениот фронт постепено може да се прошири и кон нашите простори во наредните неколку денови, особено кон северните и планинските региони. Граѓаните се советуваат да ја следат локалната временска прогноза за точни информации за снег и ниски температури.

Србија се подготвува за вистински метеоролошки хаос. Републичкиот хидрометеоролошки завод (РХМЗ) предупредува на студен фронт кој од сабота навечер ќе донесе нагло заладување. Северните региони, особено Војводина, ќе бидат покриени со снег кој локално може да достигне и до 30 сантиметри, додека јужните и југоисточните делови ќе се соочат со опасен смрзнат дожд.

Во сабота времето ќе биде умерено до целосно облачно, со снег на северот и западните краишта, додека југот ќе биде потопло, но со дожд кој во вечерните часови може да замрзнува при контакт со земјата. Ветерот ќе биде слаб до умерен северозападен на север, и умерен до силен југозападен на југ.

Минималните температури ќе се движат од -3 до 5°C, а максималните од 2°C на север до 8°C на југоисток. За поголем дел од северот и западот е активиран жолт метео-аларм, додека на југот и југоистокот е на сила и портокалов метео-аларм, поради опасност од ледена дождовница и отежани услови во сообраќајот.

Следната недела времето ќе остане облачно и студено, со дополнително зголемување на снежниот покривач во северните, западните и централните делови. Југот ќе продолжи да има дожд кој ќе замрзнува при контакт со земјата, создавајќи опасни и лизгави патишта. Средината на неделата носи дополнително заладување, а кон крајот на периодот се очекува стабилизација и делумно разведрување.

Совет на РХМЗ: Зголемена претпазливост на патиштата, следење на метео-алармите и препораките на надлежните служби за безбедност на луѓето и животните.

Loading