„30 МИЛИОНИ ЕВРА И 14 ЖРТВИ!“ – Се отвораат нови прашања за модуларната болница

Трагедијата во модуларната болница во Тетово, во која животот го загубија 14 лица, повторно се најде во центарот на јавноста по новите обвинувања изнесени од членот на Централниот комитет на ВМРО-ДПМНЕ, Валентин Манасиевски.

Тој упати сериозни критики кон поранешната власт на СДСМ и тогашниот министер за здравство Венко Филипче, оценувајќи дека несреќата претставува „најцрн симбол“ на начинот на управување со здравствениот систем во периодот на пандемијата.

Обвинувања за законски измени и безбедносни пропусти

Манасиевски посочи дека во екот на ковид-кризата бил изменет Законот за градење, при што модуларните болници биле категоризирани како „урбана опрема“. Според него, со тоа биле заобиколени редовните процедури и контроли, а одобренијата за поставување ги издавало Министерството за здравство.

Тој се повика и на јавни изјави на поранешната обвинителка Лејла Кадриу, кои, според него, укажуваат на сериозни пропусти при изградбата. Меѓу наведените отстапки се поставување панели со пур пена наместо со камена волна, како и отсуство на елаборат за електрична енергија и соодветна разводна табла – елементи што, според нивните тврдења, можеле да придонесат за фаталниот исход.

Прашања за финансиските средства

Манасиевски изнесе и тврдења дека постоела можност ковид-пациентите да бидат сместени во постојните болнички капацитети, но наместо тоа бил реализиран проект вреден милиони евра. Тој постави прашање каде завршиле средствата од обезбедените 30 милиони евра, наведувајќи дека за изградбата биле потрошени околу 300.000 евра.

Во изјавата беше посочено и дека Кадриу била суспендирана откако побарала градежно вештачење, што, според него, отвора сомнеж за можни притисоци и партизација на правосудниот систем.

Барање за целосна истрага

Од ВМРО-ДПМНЕ бараат целосна и транспарентна истрага, како и утврдување на одговорност за случајот што ја потресе македонската јавност. Тие оценуваат дека граѓаните заслужуваат правда и расчистување на сите околности поврзани со трагедијата во Тетово.

Loading