БЛОКАДА ИЛИ ЈАВНА ДЕБАТА: Филипче тргнува против „Скопје 2028“, Мицкоски го враќа законот пред граѓаните

Предлог-законот поврзан со проектот „Скопје – Европска престолнина на културата 2028“ прераснува во ново поле на жестока политичка пресметка. Лидерот на СДСМ, Венко Филипче, најави дека опозицијата во септември ќе ги употреби сите расположливи демократски механизми за да го спречи неговото донесување, додека премиерот Христијан Мицкоски тврди дека предложеното решение е во согласност со европските практики.

Филипче најави „жешка политичка есен“, во која СДСМ, покрај блокадата на законот за „Скопје 2028“, ќе поднесе и интерпелации за собранискиот претседател Африм Гаши и за министерот Иван Стоилковиќ.

Според лидерот на опозицијата, Собранието сè повеќе функционира како гласачка машинерија на парламентарното мнозинство, а иницијативите и предлозите на СДСМ воопшто не добиваат можност да бидат разгледани. Тој го обвини Гаши за непочитување на Деловникот, посочувајќи го и однесувањето на потпретседателката на Собранието Весна Бендевска за време на седницата за пратенички прашања.

Филипче смета дека преку паузи и одложувања било создадено сценарио со кое на премиерот Мицкоски му било овозможено да избегне одговори на прашањата на пратениците. Поради ваквиот начин на раководење со Собранието, СДСМ најавува интерпелација за Гаши.

Особено остри критики опозицискиот лидер упати кон предлог-законот за реализација на проектот „Скопје 2028“. Тој оцени дека со него се отвора можност за заобиколување на редовните постапки за јавни набавки и порача дека такво законско решение не смее да добие поддршка во Собранието.

Од Владата, пак, пристигна сосема поинакво толкување. Мицкоски изјави дека во јавноста намерно се пласираат дезинформации и дека предложениот модел не отстапува од европските стандарди, посочувајќи го искуството на Хелсинки како пример.

Сепак, за да се отстранат сите дилеми и сомнежи, премиерот потврди дека на негово барање законот е повлечен од собраниска процедура и ќе биде ставен на поширока јавна дебата.

„Нема да дозволам да остане ниту милиметар сомнеж во кој било процес“, порача Мицкоски, додавајќи дека консултациите може да предизвикаат извесно доцнење, но дека целта останува Скопје навремено да се подготви за титулата Европска престолнина на културата во 2028 година.

Покрај спорот околу културниот проект, Филипче соопшти дека СДСМ ќе го поддржи барањето на ДУИ за формирање анкетна комисија за случувањата поврзани со министерот Стоилковиќ за време на седницата за реконструкција на Владата.

Опозицијата најавува и интерпелација за Стоилковиќ поради тврдењата дека упатувал навреди и пцости кон пратениците Фатмир Битиќи и Бојан Трајчулевски, како во текот на седницата, така и за време на паузата, кога ситуацијата наводно била блиску до физички инцидент.

Најавите упатуваат дека по летната пауза Собранието го очекува исклучително тензичен политички период, со интерпелации, блокади и отворена битка околу начинот на кој ќе се реализира еден од најголемите културни проекти во земјата.

Loading