Турскиот интерес за македонско државјанство и фирми: Кој е вистинскиот мотив – економија или лесен престој?
Во последните четири години, околу 10.500 граѓани на Турција поднеле барање за македонско државјанство, базирано на македонско потекло, што според МВР се должи на законските измени од 2021 година кои го олесниле процесот за иселениците.
Истовремено, податоците на Македонско-турската стопанска комора (МАТТО) покажуваат дека во 2024 година се регистрирани 4.132 фирми со турски капитал. На прв поглед, тоа укажува на раст на економската соработка помеѓу двете земји.
Но, аналитичарите предупредуваат дека дел од овие фирми може да се отвораат со други мотиви. Постојат индикации дека многу од нив се регистрирани само за добивање на престој или привилегии, а почетниот капитал не се внесува, односно се користи законската одредба за внесување на истиот дури една година по основањето. Ова ја намалува реалната економска активност на овие компании.
Тоа значи дека високите бројки не секогаш одразуваат вистинска економска соработка или турски инвестиции, туку можат да бидат резултат на правна и бирократска можност за поедноставен престој и државјанство.
Прашањето кое се поставува е: дали Македонија навистина привлекува инвеститори, или само станува место каде што турските граѓани со македонско потекло ги користат новите законски олеснувања за престој и државјанство?
Ако се сака реален економски ефект, потребно е длабинско следење на активностите и вложувањата на овие компании, наместо само бројот на регистрирани фирми да се зема како мерка за економска соработка.
![]()

