Во Битола официјално започнаа градежните работи на јужната трибина на фудбалскиот стадион „Петар Милошевски“, со што градот прави значаен чекор напред во унапредувањето на спортската инфраструктура. Проектот претставува дел од поширока стратегија за модернизација на спортските објекти и создавање услови за организирање на меѓународни натпревари.
Реконструкцијата опфаќа целосна санација на трибината, вклучувајќи обновување на скалите, обработка и премачкување на површините, како и поставување на вкупно 4.852 нови седишта, со што значително ќе се зголемат комфорот и безбедноста за гледачите.
Градоначалникот на Општина Битола, Тони Коњановски, заедно со советници и претставници на надлежните служби, изврши увид на терен и истакна дека проектот се реализира со финансиска поддршка од Владата на Република Македонија, преку јавен повик за инфраструктурни инвестиции.
Санацијата на јужната трибина е клучен дел од подготовките за одржување на меѓународни фудбалски натпревари, меѓу кои и квалификацискиот дуел помеѓу репрезентациите до 21 година на Македонија и Италија, закажан за септември оваа година.
По завршувањето на реконструкцијата, стадионот „Петар Милошевски“ ќе ги исполнува современите европски стандарди, обезбедувајќи подобри услови за натпреварување и публика, што дополнително ќе ја зацврсти позицијата на Битола како важен спортски центар во државата.
![]()

