Политичките тензии во редовите на коалицијата „Вреди“ продолжуваат да се засилуваат, откако во јавноста се појави фотографија од министерот за социјална политика, демографија и млади Фатмир Лимани на ифтарска вечера во Тирана заедно со лидерот на ДУИ, Али Ахмети. Настанот предизвика бурни реакции во коалицијата, каде што Лимани доаѓа од редовите на движењето Беса, а дел од партиските функционери побараа објаснување за неговото присуство на средбата.
Лидерот на Беса, Билал Касами, изјави дека фотографијата не испраќа добра порака и дека од министерот се очекува да ја појасни причината за средбата. Тој посочи дека темата ќе биде разгледана во рамките на коалицијата „Вреди“.

Лимани, пак, на социјалните мрежи објасни дека бил поканет од албанскиот премиер Еди Рама на ифтарска вечера и дека присуствувал како гостин, нагласувајќи дека ваквите настани се дел од традицијата и гостопримството, а не место за политички пресметки. Според него, софрата треба да биде простор за почит и заедништво, а не за создавање политички дилеми.
Во својата реакција министерот посочи и дека во рамките на коалицијата „Вреди“ веќе подолго време постојат внатрешни тензии и обиди за маргинализирање на дел од политичарите кои биле меѓу главните носители на проектот за обединување на албанскиот политички блок. Тој порача дека нема да остане пасивен во ситуација кога се прават обиди за негово политичко изолирање.

Односите меѓу Лимани и раководството на коалицијата се нарушени веќе подолг период, а во политичките кругови сè почесто се споменува и можноста за реконструкција на Владата. И покрај тоа, премиерот Христијан Мицкоски неодамна изјави дека е задоволен од работата на министерот и дека тој претставува значајна вредност за ресорот што го води.
Токму ваквата ситуација отвора дилема како ќе се реши евентуалниот судир меѓу позициите на коалицијата „Вреди“, која смета дека министерското место ѝ припаѓа нејзе, и ставот на премиерот како мандатар на Владата.
Во меѓувреме, во политичките анализи се споменува и можноста Лимани да формира сопствен политички субјект доколку се продлабочат несогласувањата со коалицијата. Политичкиот аналитичар Џелал Незири смета дека најреална опција е министерот да основа нова партија и да остане дел од владејачкото мнозинство, но надвор од рамките на „Вреди“.

Во јавноста веќе се појавија неофицијални информации дека Лимани би можел да формира политичка партија под името „Европска лига“, но тој засега не ја потврди оваа можност. Во последната изјава нагласи дека сите негови чекори ќе бидат водени од интересите на граѓаните и дека конечната одлука за неговата политичка иднина ќе ја донесе по консултациите што се во тек.
Дополнителна неизвесност создаваат и внатрешните несогласувања во самата коалиција „Вреди“, каде што процесот на обединување на партиите се соочува со сериозни предизвици. Според информации од политички извори, договор за спојување има само меѓу дел од партиските лидери, додека преговорите со другите политички групи сè уште се далеку од финално решение.
Несогласувањата околу составот на раководството на новата политичка структура дополнително ги продлабочуваат поделбите. Во вакви околности, развојот на настаните во следниот период може значително да влијае врз стабилноста на коалицијата, но и врз односите во владината коалиција.
Дали Лимани ќе остане дел од „Вреди“, ќе формира нова политичка партија или ќе се отвори нова политичка конфигурација во Владата, останува прашање на кое одговорот ќе се знае во периодот што следува.
![]()

