Аферата „Рекет“ повторно е во фокусот на јавноста, откако ВМРО-ДПМНЕ постави нови прашања за судбината на парите кои, според обвиненијата, биле земени како рекет.
Контроверзните личности Бојан Јовановски – Боки 13 и Зоран Милевски – Кичеец се појавуваат во познатата видео-снимка од безбедносни камери, на која се гледа како ја напуштаат куќата на бизнисменот Јордан Камчев носејќи торба. Според наводите, во неа имало околу 1,5 милиони евра.
Иако случајот беше предмет на истрага, парите никогаш не беа пронајдени. Наместо директно да се бара одговор од осудените во случајот, ВМРО-ДПМНЕ упати прашање до СДСМ – каде завршиле средствата од „Рекет“.

Од партијата посочуваат дека постојат сомнежи оти дел од парите завршиле кај Зоран Башановиќ, кој се споменува како близок соработник на поранешниот премиер Зоран Заев. Според нивни наводи, ваквите информации доаѓаат од извори во регионот, вклучително и медиуми од Србија.
Дополнително, од ВМРО-ДПМНЕ велат дека во јавноста кружат тврдења и за можна поврзаност на други лица, меѓу кои и членови од семејството Заеви, со средствата од оваа афера.
Сепак, клучното прашање останува отворено: што се случи со торбата со пари која беше изнесена од домот на Камчев? Одговорот, според многумина, треба да го дадат токму лицата кои директно учествуваа во настаните.
![]()

