АЛАРМ ОД УНИВЕРЗИТЕТИТЕ: НОВИОТ ЗАКОН НЕ НОСИ ВИСТИНСКИ РЕФОРМИ!

Забелешките на универзитетите и студентите не се доволно земени предвид во новиот Закон за високо образование, оценуваат експерти и претставници на образовниот сектор. Во јавноста се отвори дебата дали предложените измени навистина ќе донесат подобрување на квалитетот или ќе останат само формална реформа без суштински ефект.

Професорот Башким Зибери во гостување во емисија посочи дека значителен дел од сугестиите на академската заедница биле игнорирани. Според него, прашањето за автономијата на универзитетите е сведено главно на финансиски аспект, при што очекува во финалната верзија да се намали директното влијание на Министерството за финансии врз универзитетските буџети.

Од друга страна, Бленди Ходаи од Форумот за промени во образованието остро реагираше, оценувајќи дека предложениот закон повеќе создава „илузија за квалитет“, отколку што нуди реални решенија. Тој предупреди дека постои ризик од дополнително зацврстување на позиции на дел од академскиот кадар, без вистински напредок во системот.

Во меѓувреме, заменик-министерот за образование Дритон Сулејмани информира дека законот е во завршна фаза на подготовка, но нагласи дека сè уште има простор за подобрувања. Тој истакна дека реформата е покрената како одговор на долгогодишните проблеми со квалитетот во високото образование и дека дел од забелешките ќе бидат вклучени.

Политичките реакции исто така не изостануваат. Од опозициските редови најавија дека нема да го поддржат законот, оценувајќи дека се нарушува универзитетската автономија. Министерката за образование, пак, изрази уверување дека во текот на парламентарната постапка може да се постигне поширок консензус, иако сè уште не е утврден точниот датум за доставување на законот во Собранието.

Дебатата околу реформите во високото образование продолжува, додека јавноста очекува конкретни решенија што ќе придонесат за подобар квалитет и поголема независност на универзитетите.

Loading