КОГА СЕ ВО ОПОЗИЦИЈА „РЕЖИМОТ“ Е НАСЕКАДЕ – Филипче од Брисел со алармантна порака

Филипче од Брисел прогласи режим, заборави кој владееше вчера

Лидерот на СДСМ, Венко Филипче, денеска престојува во Брисел, каде што според објавените фотографии учествува на состанок на групата на социјалистички и социјалдемократски партии. Од белгиската престолнина, Филипче испрати пораки дека неговите средби се насочени кон обезбедување меѓународна поддршка за, како што наведува, „одбрана на демократијата во Македонија“.

Повод за ваквите пораки е резолуцијата што неодамна беше донесена во Собранието, а која, според Филипче, претставува прв ваков документ во историјата на државата насочен против опозицијата. Тој оцени дека со вакви чекори се загрозуваат слободата на говор, политичкото дејствување и демократскиот поредок.

„Кога парламент носи неуставна резолуција против опозицијата, државата влегува во авторитаризам“, порача Филипче, обвинувајќи ја власта дека се обидува да ја замолчи опозицијата и да воспостави еднопартиски модел.

Филипче најави дека во Брисел ќе побара поддршка од европските прогресивни и демократски сили, како и од сестринските социјалистички партии, со цел, како што рече, Македонија да остане слободна, демократска и европска држава. Воедно повика на формирање „единствен граѓански фронт“ за одбрана на демократијата и слободата на говорот.

Инаку, во Брисел од завчера престојува и премиерот Христијан Мицкоски, што дополнително го насочува вниманието кон пораките кои македонските политички лидери ги испраќаат од европските институции.

Loading