Македонија не се најде на списокот на поканети земји во таканаречениот „Одбор за мир“ формиран од американскиот претседател Доналд Трамп. Иако новите македонски власти се сметаат за идеолошки поблиски до актуелната администрација во Вашингтон, тоа очигледно не беше доволно за официјална покана. Надвор од процесот остана и Србија, додека Албанија доби место на масата.

Учеството на Македонија во „Одборот за мир“ би било од стратешка корист и на дипломатски и на безбедносен план. Таквото членство би ја позиционирало државата како конструктивен и доверлив партнер во меѓународните мировни процеси, би ја зголемило нејзината видливост во Вашингтон и кај клучните глобални актери, и би отворило простор за директно учество во одлуки поврзани со постконфликтна реконструкција, безбедност и економски развој. За Македонија, која долгорочно се стреми кон зацврстување на својата меѓународна улога и политичка релевантност, вакво присуство би значело дополнителна тежина во надворешната политика, подобар пристап до дипломатски мрежи и можност да се профилира како фактор на стабилност, а не само како пасивен набљудувач на глобалните процеси.

Белата куќа официјално ја претстави архитектурата на „Одборот за мир“, тело што треба да го спроведе мировниот план од 20 точки за Газа. Планот беше активиран по стартот на „втората фаза“ од американското посредување, што го најави специјалниот пратеник Стив Виткоф, објави Ал Џезира.
Новата тристепена структура вклучува:
-
Одбор за мир предводен од САД, составен од милијардери и личности блиски до Израел
-
Висок претставник, бугарскиот дипломат Николај Младенов
-
Палестинска технократска администрација – Национален комитет за управување со Газа
Иако планот се промовира како проект за „реконструкција и просперитет“, аналитичарите предупредуваат дека исклучувањето на Палестинците од највисокото тело за одлучување создава модел што наликува на „комерцијален протекторат“.
Церемонијата на потпишување Трамп сака да се одржи во Давос, и покрај повиците за ревизија на условите, пренесе Блумберг.
Од регионот, покани добија албанскиот премиер Еди Рама, хрватскиот премиер Андреј Пленковиќ и словенечкиот премиер Роберт Голоб.
Меѓу светските лидери кои ја прифатија поканата се и аргентинскиот претседател Хавиер Миле, канадскиот премиер Марк Карни и унгарскиот премиер Виктор Орбан, кој јавно ја нарече поканата „почесна“, пренесе Ројтерс.
Отсуството на Македонија од овој формат отвора сериозни прашања за нејзината реална позиција во новите геополитички пресметки – дали станува збор за дипломатски пропуст или за свесна одлука на Вашингтон?
![]()

