Од ВМРО-ДПМНЕ реагираат на најавите за одземање предмети од одредени обвинители, оценувајќи дека ваквиот чекор наметнува сериозни дилеми околу нивната досегашна работа и одговорност.
Во партиското соопштение се истакнува дека е потребно да се преиспита улогата на обвинители кои биле активни во периодот на владеење на Зоран Заев. Меѓу имињата што се споменуваат се Гаврил Бубевски, Ленче Ристоска и Лиле Стефанова, за кои се бара да дадат одговори за своето постапување во изминатиот период.

Од партијата поставуваат прашања дали треба да се утврди евентуална одговорност за, како што наведуваат, несоодветно трошење средства и постапки кои, според нив, имале политичка позадина. Во реакцијата се повикуваат и на изјави на обвинителката Лејла Кадриу, во кои се посочува на наводно влијание од страна на поранешни владини функционери, меѓу кои и Радмила Шекеринска.
Дополнително, се споменува и улогата на Катица Јанева, како поранешен раководител на Специјалното јавно обвинителство, за која од ВМРО-ДПМНЕ тврдат дека била дел од систем кој, според нив, функционирал под политичко влијание.
Од партијата заклучуваат дека дел од обвинителите биле поврзани со структура која, како што наведуваат, имала влијание врз правосудниот систем и довербата во институциите.
![]()

