Научна анализа за преживување на нуклеарна експлозија: Колку оддалечен треба да се биде?

Кое е минималното растојание за преживување на нуклеарна експлозија? Иако прашањето е загрижувачко, има за него цврсти научни основи кои деновиве повторно почнаа да се реобјавуваат во странските медиуми. Експлозија од 1 мегатон, која е многу посилна од бомбата фрлена на Хирошима, предизвикува низа непосредни и секундарни ефекти, чиј интензитет зависи од растојанието од епицентарот и местоположбата на лицето во моментот на ударот.

Првиот забележлив феномен е топлинскиот блесок: блесок на светлина и топлина што се шири со брзина на светлината, способен да предизвика привремена слепило дури и до повеќе од дваесет километри во текот на денот и до осумдесет километри во ноќните часови.

Практично истовремено пристигнува и топлинското зрачење, кое може да предизвика сериозни изгореници: на осум километри се јавуваат изгореници од трет степен, а на единаесет километри од прв степен.

Потоа се создава ударен бран, фронт на притисок и ветер што може да сотре лесни структури до шест километри од местото на експлозијата. На растојанија помали од еден километар, силата на ударниот бран достигнува разорни врвови, со ветрови над седумстотини километри на час и смртоносен притисок за секој организам или зграда/објект.

На крај, радиоактивните честички ослободени од експлозијата паѓаат на земја во форма на радиоактивен отпад (фал-аут).

Ако бомбата експлодира на површината на земјата, контаминираниот материјал подигнат од кратерот се комбинира со радионуклиди и се распрснува низ воздухот, со потенцијално смртоносни ефекти во радиус од десетици километри, пренесува Саенс алерт.

Преживувањето не зависи само од растојанието, туку и од видот на засолниште: лицата што се наоѓаат во цврсти објекти од армиран бетон, без прозорци, имаат поголеми шанси за спас во споредба со оние кои се изложени на отворено или се во лесни градби. Внатрешните простории, оддалечени од отвори, го намалуваат ризикот од повреди предизвикани од стакло или удари на компримиран воздух.

Дури и неколку секунди брза реакција, ако се искористат за наоѓање засолниште, можат да направат голема разлика. Во зоните меѓу три и десет километри од нултата точка, без соодветно засолниште, преживувањето е малку веројатно. Надвор од тој радиус, шансите значително се зголемуваат, иако и понатаму постојат ризици поврзани со изложеност на радијација.

Анализата на ефектите од една единствена нуклеарна детонација ја истакнува кревкоста на урбаната инфраструктура и биолошката ранливост на човекот. Во сценарио на нуклеарна војна, дури и ограничена, последиците би биле немерливи и би се протегале многу подалеку од моментот на самата експлозија. За жал, ова не е само теоретска тема, туку прашање што сè повеќе се поврзува со актуелните геополитички случувања, пренесува Саенс алерт.

 

 

Loading