Украинската јавност е потресена по убиството на висок функционер на Службата за безбедност на Украина (СБУ), полковник Иван Воронич, кој утринава беше застрелан додека пешачел низ населбата Голосеевски во Киев.
Според првичните информации, Воронич околу 9 часот по локално време ја преминувал улицата кога му пришол непознат маж и отворил оган. Сведоци на настанот изјавиле дека напаѓачот носел црна маица и шорц, и дека испукал пет истрели од пиштол со заглушувач. Полковникот починал на самото место од здобиените повреди, а убиецот веднаш побегнал од местото на настанот.
Службата за безбедност на Украина потврди дека Воронич бил поранешен оперативец во Центарот за специјални операции и соопшти дека е отворен кривичен предмет за убиство на нивен припадник.
„Кривична постапка е отворена поради убиство на службеник на СБУ на територија на Киев. Работиме интензивно за да се расветли овој тешок злостор“, се наведува во официјалното соопштение на СБУ.
Мотивите за убиството и идентитетот на напаѓачот засега остануваат непознати. Безбедносните сили на Украина веќе започнаа проширена истрага, со прегледување на видео-снимки и собирање на сведоштва од граѓани.
Полковникот Воронич бил активен во оперативните структури на СБУ и, според украински медиуми, учествувал во повеќе доверливи мисии. Убиството отвора прашања за безбедносната состојба во главниот град, особено кога станува збор за високи функционери во време на засилена геополитичка нестабилност.
Очекувањата се дека во следните денови ќе има повеќе информации од страна на украинските власти за напредокот на истрагата.
![]()

