Зеленски пред состанокот Трамп-Путин: Украина нема да ѝ дозволи на Русија да ја измами Америка

Украинскиот претседател Володимир Зеленски изјави дека Киев нема да дозволи Москва да го „измами“ Вашингтон, во пресрет на планираниот состанок меѓу американскиот претседател Доналд Трамп и рускиот лидер Владимир Путин.

„Нашиот тим секојдневно комуницира со САД за да обезбедиме вистински мир. Ја разбираме целта на Русија – да се обиде да ја измами Америка – и нема да дозволиме тоа да се случи. Ја ценам решителноста со која претседателот Трамп е посветен на запирање на убиствата во оваа војна,“ рече Зеленски.

Откако стапи на функцијата, администрацијата на Трамп се обидува да ја заврши војната во Украина, но засега без успех, пишува The Hill.

Трамп минатата недела најави дека ќе се сретне со Путин на 15 август 2025 година во Алјаска, каде што ќе разговараат за можен крај на војната. „Овој долгоочекуван состанок ќе се одржи следниот петок во големата држава Алјаска. Детали ќе следат,“ изјави американскиот претседател.

Зеленски, пак, нагласи дека секојдневно „многу луѓе ги губат своите животи“ и дека единствената причина за тоа е „желбата на Путин да води војна и да манипулира со секого со кого стапува во контакт“.

„Ние во Украина добро ја познаваме Русија. Затоа, и покрај исклучително тешките околности, Украинците издржаа повеќе од три години целосна војна. Ќе ја браниме нашата држава и независност. Благодарен сум на сите што ни помагаат,“ додаде тој.

Loading