Преговорите меѓу Русија и САД завршија во Истанбул по речиси шест часа разговори, вклучувајќи и пауза за ручек, јавува дописникот на РИА Новости. Американската делегација по состанокот го напуштила Генералниот конзулат на Русија во Турција.
Според извори запознаени со преговорите, делегациите нема да дадат јавни изјави по завршувањето на разговорите.
Портпаролот на Кремљ, Дмитриј Песков, изјави дека единствената тема на состанокот била нормализацијата на дипломатските односи меѓу двете земји. Прашањето за Украина воопшто не било отворено за време на дискусиите.
Состанокот, кој започна во 10 часот во просториите на рускиот конзулат во Истанбул, го предводеше амбасадорот на Русија во САД, Александар Дарчиев. Американската страна ја претставуваше Соната Калтер, заменик-помошничка државен секретар за европски и евроазиски прашања, заедно со претставници од министерствата за надворешни работи на двете земји.
Овој состанок доаѓа по првиот чекор кон обновување на односите, направен на средбата во Ријад на 18 февруари, каде што двете страни се согласија да создадат услови за целосно продолжување на билатералната соработка, отстранување на ограничувањата за работа на амбасадите, како и иницирање процес за решавање на ситуацијата во Украина.
Кон крајот на февруари, повторно во Истанбул, делегациите разговараа за финансирање на дипломатските мисии и можноста за повторно воспоставување директни летови меѓу двете земји.
Во изминатите два месеца, претседателите Владимир Путин и Доналд Трамп оствариле два телефонски разговори, а минатата недела директорот на Рускиот фонд за директни инвестиции, Кирил Дмитриев, ги посети САД и се сретна со претставници на Белата куќа. Според него, направен е значителен напредок во повеќе области, но допрва претстојат дополнителни разговори за надминување на преостанатите разлики.
![]()

