Од утре, 1 јули, пушењето на јавни места како плажи, паркови, автобуски постојки и во близина на училишта и градинки, станува официјално забрането низ цела Франција. Со нова мерка што стапува на сила преку указ објавен во Службениот весник, француските власти се насочуваат кон построга заштита на децата и младите од изложеност на тутун.
Забраната важи за сите јавни зелени површини, јавни градини, како и за зони каде се чека јавен превоз – вклучително и под сенки на автобуските постојки. Исто така, пушењето не е дозволено во радиус од најмалку 10 метри околу библиотеки, училишта, спортски објекти и слични установи кои ги посетуваат малолетни лица. Конечната дефиниција за овие „зони без чад“ ќе биде објавена во следните денови, заедно со нови визуелни ознаки.
Сепак, електронските цигари не се опфатени со оваа одредба, што предизвика критики од анти-тутунските организации. Исто така, пушењето на терасите на баровите и рестораните останува дозволено.
„Каде што има деца, таму нема место за тутун. Плажа, парк или училиште треба да бидат места за игра, учење и чист воздух – а не чад од цигари“, истакнаа министерката за здравство Катрин Вотрен и нејзиниот заменик Јаник Нодер. Тие ја претставија мерката како уште еден чекор кон целта Франција да стане „нација без тутун“ до 2032 година, дел од Националниот план за контрола на тутунот 2023–2027.
Прекршителите ќе се соочат со казна од 135 евра, која може да достигне и до 750 евра во случаи на повторени прекршоци. Властите најавија и краток преоден период со едукативен пристап, пред целосната примена на казните.
Со ова, Франција се приклучува на сè поголем број земји кои ги ограничуваат јавните места за пушење, со цел да се намали зависноста од никотин кај младите и да се подобри јавното здравје.
![]()

