Велигденските празници се симбол на обновување, радост и семејна блискост. Но покрај духовната вредност, ова време е и најголем тест за нашиот дигестивен и имунолошки систем. Празничните трпези се преполни со калорична и тешка храна, а најчестите комбинации – како месо со руска салата и слатки после главното јадење – можат да создадат сериозни нарушувања во организмот, предупредуваат нутриционистите.
Според професорот д-р Дејан Чубрило, комбинацијата од месо, мајонез, јајца и скроб – што најчесто ја имаме во форма на руска салата – со тешки протеини од месото создава хемиска реакција која телото не може ефикасно да ја обработи. Последица од тоа е акумулација на несварени материи и создавање на гасови кои не се исфрлаат целосно, туку навлегуваат во крвотокот, влијаат врз работата на црниот дроб, предизвикуваат воспалителни процеси и го ослабуваат имуниот систем.
Наталја Зубарева, руска докторка и експертка за функционална медицина, објаснува дека токму тешките, „разнообразни“ трпези со многу различни состојки кои се јадат во краток рок се главен виновник за постпразничен замор, пад на енергија и зголемена подложност на инфекции. Таа вели дека телото не може да одговори на овој гастрономски шок, а имунолошкиот систем, наместо да се бори со реални надворешни закани (вируси, бактерии), се троши на справување со внатрешниот „хаос“.
Што се случува кога ќе додадеме и шеќер?
Празничните слатки – од чоколади до торти – само ја влошуваат состојбата. Според ендокринолозите од Институтот за исхрана на Руската академија на медицински науки, шеќерот не само што го зголемува инсулинот, туку директно го потиснува имуниот систем за најмалку неколку часа по внесувањето. Истражувањата покажуваат дека по само 100 грама шеќер, активноста на белите крвни клетки – главните борци против инфекции – опаѓа за 40%. Во услови кога телото веќе е преоптоварено од тешка храна, оваа комбинација е идеална подлога за развој на воспаленија и вируси.
Што можеме да направиме?
Нутриционистите предлагаат неколку практични совети:
Избегнувајте мешање на масти и скроб – Руска салата и месо во ист оброк? Подобро не.
Јадете во интервали и со мера – Наместо прејадување во еден оброк, јадете помали порции неколку пати во денот.
Свежа храна пред оброк – Почнете со зелена салата или ферментиран зеленчук за подобро варење.
Без десерт веднаш по ручекот – Почекајте најмалку 2 часа пред да земете благо.
Вода и движење – Пијте млака вода меѓу оброците и излезете на кратка прошетка.
Велигден е празник на светлината и на животот – па зошто да не му дадеме приоритет токму на нашето здравје? Храната не треба да ни биде извор на болест, туку на енергија, сила и радост. Затоа, уживајте во трпезата – но со почит и свесност кон своето тело.
![]()

