Европа се соочува со пензиска криза: Сиромаштија им се заканува на милиони пензионери, овие земји се најпогодени

Сиромаштијата во староста би можела да стане реалност за голем дел од Европејците доколку не се спроведат темелни реформи на пензиските системи, предупредува Европската агенција за осигурување и пензии (EIOPA).

„Еден од пет Европејци е во ризик да живее во сиромаштија по пензионирањето, а кај жените ризикот е дури 30 проценти поголем“, изјави директорката Петра Хиелкема.

Брзото стареење на населението значи дека за 40 години ќе има само еден и пол работник за секој пензионер, бројка која не е одржлива. Најпогодени се земјите од Источна и Јужна Европа, како Бугарија, Романија, Хрватска, Грција, но и Италија и Шпанија каде пензиските системи речиси целосно зависат од државните фондови, а износите на пензиите често се далеку под просечните плати.

За разлика од нив, скандинавските држави, Холандија и Германија имаат комбиниран модел со државни и приватни пензиски фондови, што им овозможува подобра заштита на пензионерите, но секако и тие ќе се соочат со кризата.

Европската комисија најавува мерки како дигитални пензиски сметки, автоматско вклучување на работниците во фондови и даночни поттикнувања за штедење. Сепак, спроведувањето останува во рацете на националните влади, а прашањето за пензиските реформи останува едно од најполитички чувствителните во Европа.

Loading