Оливер Мандиќ ќе настапи во Охрид по повеќе од 30 години: На „Охрид-фест 2025“  ќе му биде врачена награда за трајни вредности

Српската музичка легенда, кантавторот Оливер Мандиќ, ќе биде еден од специјалните гости на годинашното 32. издание на интернационалниот музички фестивал „Охрид-фест – Охридски трубадури“. Мандиќ ќе настапи на Интернационалната вечер, која ќе се одржи на 30 август на сцената на Долни Сарај, и ќе биде добитник на наградата за трајни вредности, за неговиот безвременски хит „Питају ме, питају“ – песна која го одбележа фестивалот МЕСАМ во Белград во 1984 година.

„Минатата година се навршија точно 40 години од таа победа, а токму тогаш Григор Копров ме покани да дојдам во Охрид и да го одбележиме јубилејот. Поради здравствени причини тоа не се оствари, но годинава со голема радост прифатив. Иако неодамна претрпев тешка операција на ’рбетот, се чувствувам добро и едвај чекам да запеам пред охридската публика“, изјави Мандиќ, додавајќи дека Охрид за него е „како море“ и дека се радува како дете за доаѓањето.

Неговиот последен настап во Охрид бил пред повеќе од 30 години, а охриѓани и љубителите на добрата музика се сеќаваат на таа атмосфера во локален клуб од почетокот на 90-тите. Во Скопје, пак, последен пат настапил во 2010 година, на концерт посветен на Тоше Проески, заедно со браќата Тавитјан и Беби Дол, кога заеднички ја изведоа песната „Пробуди се на час“.

Фестивалот „Охрид-фест – Охридски трубадури“ ќе започне на 29 август со Фолк вечерта, додека на 30 август ќе се одржи Интернационалната вечер. На фестивалската сцена годинава ќе настапат и Сузана Спасовска, Бојана Скендеровски, Сашо Гигов-Гиш, Ана Петановска, Нино Величковски, Благоја Грујовски, Бојан Маровиќ, како и српскиот евровизиски претставник Принц од Врање.

Во изминатите три децении, „Охрид-фест“ прерасна во една од најважните музички манифестации во регионот, на која настапиле врвни имиња од балканската музичка сцена како Калиопи, Тоше Проески, Мики Јевремовиќ, Јасмин Ставрос, „Boney M“, Сања Долежал и многу други.

Ова лето, фестивалската традиција ќе продолжи со настапот на Оливер Мандиќ – еден од најавтентичните музички автори на поранешна Југославија, кој и по неколку децении останува доследен на својот уникатен музички израз и поврзаност со публиката.

Loading