По повеќе од 50 години, конечно повторно се отвора граничниот премин Маркова Нога – Лемос.
Граничниот премин Маркова Нога – Лемос, што ја поврзува Македонија со Грција во регионот на Преспанското Езеро, ќе биде повторно отворен по пауза од повеќе од пет децении, што претставува значаен чекор кон зголемување на поврзаноста, туризмот и прекуграничната соработка.
Отворањето е од особено значење за македонските граѓани, кои добиваат нова и директна рута кон западниот и северозападниот дел на Грција, вклучително и туристичките дестинации во Епир и Флорина.
Граничниот премин бил во функција од 1959 до 1967 година, кога бил затворен, а сообраќајот меѓу Ресен и Преспа (Лемос) бил прекинат. Повеќе од пет децении подоцна, започна иницијатива за негова обнова и повторно отворање.
Преминот ќе биде наменет исклучиво за патнички и лесни моторни возила, без дозвола за товарен сообраќај. Планиран е и дополнителен пешачки премин меѓу селата Брајчино (Македонија) и Агиос Германос (Грција), со што ќе се олесни движењето на локалното население и ќе се создадат услови за развој на еко-туризмот, во регион познат по богатиот биодиверзитет и заштитените природни зони околу Преспанското Езеро.
На грчка страна ќе се изгради нова гранична инфраструктура, вклучувајќи зграда за полиција и царина, додека во Македонија ќе се реновираат постојните објекти и ќе се обезбеди нова опрема. Работите треба да започнат во 2025 година, а целосното отворање се очекува во февруари 2028.
Министерот за внатрешни работи на Македонија, Панче Тошковски, изјави дека целта на проектот е „подобра поврзаност и взаемна корист за жителите од двете страни на границата“, истакнувајќи го економскиот, туристичкиот и културниот потенцијал.
Иако сè уште нема конкретни проценки за економското влијание, очекувањата се дека проектот ќе придонесе за оживување на руралниот регион, зајакнување на локалната трговија, и ќе ја направи Преспа уште попривлечна за домашни и странски посетители.
![]()

