Елон Маск му објави „војна“ на Трамп: „Ќе основам нова партија ако овој луд закон помине!“

Милијардерот жестоко се спротивстави на Трамп и најави политичка офанзива доколку Конгресот го изгласа новиот закон.

Иако неодамна најави повлекување од политичкиот фокус, милијардерот и основач на Тесла, Елон Маск, во само неколку дена се врати директно во центарот на американската политичка драма. Поводот е т.н. „Голем прекрасен закон“ (One Big Beautiful Bill Act), клучна законодавна иницијатива на претседателот Доналд Трамп, за која Сенатот во моментов води интензивна расправа.

Овој закон предвидува трајно продолжување на даночните олеснувања од 2017 година, укинување на данокот на напојници и прекувремена работа, како и поголеми одбитоци за постарите граѓани. Истовремено, предвидува и рестрикции во социјалните програми како Medicaid и SNAP, и сериозно намалување на државната поддршка за зелена енергија и електрични возила – директно погодувајќи ја индустријата во која Маск има најголеми инвестиции.

Маск реагираше експлозивно на социјалната мрежа Икс (поранешен Твитер), каде што упати серија остри коментари и закани кон членовите на Конгресот. Во еден од твитовите тој напиша:

„Секој член на Конгресот што ветил намалување на трошоците, а сега гласа за најголемото зголемување на долгот во историјата, треба да се срами. И ќе ја загуби изборната трка догодина, дури и ако тоа ми биде последното нешто што ќе го направам во животот.“

Неколку часа подоцна, Маск отиде и чекор понатаму. Објави дека доколку законот биде изгласан, следниот ден ќе ја основа новата партија под името „Партија Америка“ – политичка опција што, според него, ќе биде вистинска алтернатива на „еднопартиската демократија“ што владее во САД.

„Јасно е дека со ова лудо трошење, со кое се зголемува границата на долгот за рекордни ПЕТ БИЛИОНИ ДОЛАРИ, живееме во еднопартиска држава – ПАРТИЈА НА ДЕБЕЛИТЕ ПРАСИЊА! Време е за нова политичка партија што навистина ќе се грижи за народот“, напиша Маск.

Полемиката дојде по веќе интензивната вербална пресметка меѓу Маск и Трамп која започна на почетокот на месецов, кога Маск првпат јавно го нарече законот „деструктивен и елитистички“. Претседателот не остана должен. Во свој стил, Трамп одговори со иронија и потсмев, сугерирајќи дека без државните субвенции, Маск „би морал да се врати дома во Јужна Африка“.

„Елон Маск уште одамна знаеше дека јас сум против задолжителната електрификација. Тоа секогаш било дел од мојата платформа. Електричните автомобили се во ред, но никој не треба да биде принуден да ги користи“, изјави Трамп. Тој потоа додаде дека Маск добил повеќе субвенции од кој било друг човек во историјата.

„Без тие пари, Маск ќе мораше да затвори сè – од ракетите до фабриките – и да се врати дома. Нашата земја ќе заштедеше богатство“, иронично заклучи Трамп.

Зад сцената, правата причина за гневот на Маск се токму предвидените кратења на поттикнувачките мерки за електрични возила и обновлива енергија, области во кои неговите компании – Tesla, SpaceX, и дури и SolarCity – директно зависат од државни програми. Освен економски, законот има и силен симболички удар врз имиџот што Маск го гради последниве години: како технолошки визионер кој претставува алтернатива на старата политичка гарнитура.

Од другата страна, Трамп преку законот се обидува да ги консолидира своите поддржувачи пред изборите во 2026 година, претставувајќи се како борец против бирократијата, еколошките регулативи и високите трошоци за социјални програми – пораки кои му донесоа политички успех и во 2016 и 2020 година.

И додека Сенатот го разгледува законот, а јавноста се подготвува за уште една изборна драма, судирот меѓу Маск и Трамп добива нова димензија, тоа не е повеќе само конфликт на ставови, туку директна најава за политичко престројување во САД. Маск не само што не се повлече, туку се врати поагресивен од кога било. И ако навистина ја основа својата „Партија Америка“, тоа може да го протресе американскиот политички систем до темел.

Loading